मुस्ताङ जिल्लामा छिटो पाक्ने स्याउ टिप्न सुरु

१६ भदौ, काठमाडौं ।

मुस्ताङ जिल्लामा छिटो पाक्ने स्याउ टिप्न सुरु गरिएको छ ।

सरोकारवाला निकायहरुले छिटो पाक्ने स्याउ टिप्ने सयम भदौ १५ गते तोकिए सँगै जिल्लाको स्याउ बगैँचामा धमाधम छिटो पाक्ने स्याउको ‘पोस्ट हार्भेस्ट’ सुरु गरिएको हो ।

स्याउ टिप्ने समय तोकिए सँगै किसान तथा व्यापारीले धमाधम छिटो पाक्ने जातका स्याउ टिप्न सुरु गरेका छन् ।

जिल्ला समन्वय समितिको पहलमा पाँच स्थानीय तहका जनप्रतिनिधि, कृषि तथा पशु विकास कार्यालय, राष्ट्रिय कृषि आधुनिकीकरण कार्यक्रम, कार्यक्रम कार्यान्वयन एकाइ, स्थानीय प्रशासन र कृषक प्रतिनिधिहरुको रोहबरमा जिल्लाको स्याउको गुणस्तर कायम राख्न तथा बिक्री वितरण गर्न मुस्ताङमा छिटो पाक्ने र ढिलो पाक्ने स्याउको टिपाइ कार्यतालिका सार्वजनिक गरेको थियो ।

मुस्ताङमा उत्पादन हुने स्याउको गुणस्तर राम्रो हुने तथा बजारको माग समेत पूरा गर्न, स्याउको ख्याति राम्रो हुन, स्याउमा गुलियोपना हुनु पर्ने जोड दिदै छिटो पाक्ने स्याउ यही भदौ १५ गते र ढिलो पाक्ने स्याउ भदौ २२ गते देखि टिप्न पाईने निर्णय गरिएको जनाएको छ ।

कृषि तथा पशु विकास कार्यालयका प्रमुख डा लालमणि अर्यालले जिल्लामा छिटो पाक्ने स्याउ सोमबार बाट टिप्न सुरु भएको र ढिलो पाक्ने स्याउ भदौ २२ गते बाट सुरु हुने बताएका छन् । 

अर्यालका अनुसार मुस्ताङको थासाङ, घरपझोङ र वारागुङ मुक्तिक्षेत्र गाउँपालिकामा छिटो पाक्ने अर्लि भेराईटीका गाला र गोल्डेन जातको स्याउ टिपाई सुरु भएको बताएका छन् ।

कार्यालय प्रमुख अर्यालयका अनुसार उच्चघनत्व प्रविधिमा आधारित (हाइब्रिड) जातको गाला र गोल्डेन स्याउको धमाधममा कृषकको बगैचाहरुमा ‘पोस्ट हार्भेस्ट’ भइरहेको समेत बताएका छन् ।

जिल्लामा उत्पादित छिटो पाक्ने स्याउ हरितालिका तीज पर्वलाई लक्षित गरी कृषक तथा व्यापारीहरुले स्याउ टिप्न सुरु गरेको कार्यालय प्रमुख अर्यालयले बताएका छन् ।