कार्यदलले प्रतिवेदन तयार गर्यो, भोलि शीर्ष नेतालाई बुझाईने

काठमाडौं । सत्तारुढ गठबन्धनबीच चुनावमा सिट बाँडफाँटको टुंगो लगाउन बनेको कार्यदलले प्रतिवेदन तयार गरेको छ । बुधबार प्रधानमन्त्रीको सरकारी निवास बालुवाटारमा बसेको कार्यदलको बैठकले प्रतिवेदन तयार गरेको हो ।

प्रतिवेदनलाई कार्यदलले अन्तिम रूप दिएर भोलि शीर्ष नेताहरूलाई बुझाइने बैठकपछि सरकारका प्रवक्ता तथा सञ्चारमन्त्री ज्ञानेन्द्रबहादुर कार्कीले बताए । सिट बाँडफाँट करिब–करिब टुंगिएको बताउँदै उनले भोलि बिहान ९ बजे कार्यदल बैठक बसेर प्रतिवेदनलाई अन्तिम रूप दिने बताए । कार्यदलको बैठकबाट प्रतिवेदन तयार गरेर शीर्ष नेतालाई बुझाउने उनले बताए ।

‘जुन जिम्मेवारी छ । त्यसअनुसार आज हामीले प्रतिवेदन तयार गरेका छौँ । यो प्रतिवेदनलाई भोलि बिहान अन्तिम रुप दिनेछौँ । सिट संख्या करिब करिब मिलेको छ । केही कुराहरुमा छलफलको आवश्यकता छ,’ उनले भने, ९ बजे कार्यदलको बैठक बस्छ । अन्तिम रुप दिएपछि बुझाउँछौं ।’  छलफल सकिएपछि औपचारिक जानकारी गराउने उनले बताए ।